問答題：香港去台灣有咩方法？搭飛機？坐郵輪？
相信你點都諗唔到係揸車可以去到啩？的確，呢個玩法有點取巧，但除咗過海段之外，其實任何人都可以簡單做到，而今次作為本網嘅第一篇日誌，提議一個簡單啲嘅玩法：香港 → 深圳 → 廈門 → 金門。
為咗可以唔洗請假，又可以滿足陸路玩三地嘅慾望，我地選擇咗星期五晚收工出車嘅地獄方法，收工之後由深圳福田口岸租車出發（如你有粵港牌或申請咗七 日粵港 牌另計），沿 G15 深汕高速出發，由深圳前往廈門車程約為 6.5 小時，由於這個路段全為兩線設計，日間車流量大，選擇喺晚上出發反而更加暢順，晚上 11 點出車，半夜 2 點到達潮州休息站食碗牛丸粉叉電，約 4 點已經到達距離廈門數十公里的漳浦縣休息。
目前廈門到金門，只有五通客運碼頭通航，船程約半小時，可以在碼頭買即期航班登船，第二朝早上，我地先揸大約 1小時車進入廈門，行一轉鼓浪嶼同環島公路，不過大家都知中國內地啲景點，每逢周末就是人滿為患，所以我地行咗一陣，約中午時份就直接揸車去五通碼頭，泊 低架車就坐船出發去台灣！
到達金門之後，第一時間 當然又係攞車，金門嘅租車公司非常多，但聽到攞國際駕駛執照嘅遊客都會耍手擰頭，原因係呢個個多小時就可以繞一圈嘅小島，其實處處 都是測速相機，而大部分租車公司都係現金交易，怕你走數當然唔肯租，除咗比較大嘅連鎖租車店，如三德租車，才會租俾外國人，以我地租嘅 Nissan Tiida 1.6，租金亦只是 NT 1,600（約 400 港元）/ 日，更包埋來回碼頭接送，的士錢都慳埋，玩到第二日下晝，還車去碼頭，再揸車回港。
有關廈金兩地有咩食玩 買，留番下一篇再分解，不過而家就先同大家計一計條數，其實以租車 + 租車 + 搭船呢個組合去金門，聽落好似又貴又嘥時間，但計番搭飛機再轉內陸機嘅時間同金錢，其實陸路點都係抵啲，好似我地今次深圳租車（KIA K2）當足兩日加全保，都只係 450 人民幣（約 563 港元），加上台灣一日租車錢和全程約 1,100 嘅油費、600 元的路費和約 400 元的船票，合共都只是 2,663 港元，如果人越多就越抵，如果坐飛機去台北，而家閒閒地都要 2,000 + 港元，仲未計內陸機票，相對就冇咁划算吧！還要緊記，揸車冇行李限制，我地凈係買水果同麵都唔止 20kg 啦！
