玩咗自駕遊咁多年，一直有條夢想路綫希望挑戰：滇藏綫！眼見中國嘅公路網日漸完善，國民駕車質素亦略有改善，終於決定喺 2014 年嘅暑假踏上征途。
今次嘅自駕遊路綫，預定大約 9,000 至 12,000 公里，屬歷次最長嘅一次，預算時間為 19 日，由於路綫上的天氣、政局都除時有變，出發前花了近 3 個月計畫出多條路綫及後備方案，為防止沿路嘅物資缺乏，亦需要化長時間準備，包括到廣州嘅汽車用品市場搜羅長途車必備嘅電子狗、GPS、叉電綫、車用變壓器、電子充呔器、過江龍、防結冰劑、拖車帶等等嘅求生用品，另外還有大量港產食水、零食、煮食工具、睡袋等等，未出發已經裝滿 6 大袋 IKEA 嘅購物袋。
不過講到行程入面最緊要嘅，始終係架車，喺中國揸咗咁耐車，神州租車始終係最靠得出嘅一間公司，喺 budget 有限嘅情況下，我地最後選擇咗 Ford 新出嘅迷你 SUV – Ecosports，20 整天嘅車租只係 6,777 人民幣連全保，仲平過機票錢。呢架車雖然得只得 1,5 00 cc，但算係同級入面比較高身，而且後備呔掛喺車尾，比較適合西藏路況不佳嘅路段。
做咗旅遊記者咁多年，早以戒除咗行前期待症好多年，不過今次挑戰性極高，而且充滿未知嘅危機，行前幾日始終有啲坐立不安，直至出發這天，因為瞓過龍嘅關係，趕頭趕命飛車入去落馬洲，驚都冇時間下就去咗攞車。不過，見到架真車嘅第一個反應，已經係：大鑊！估唔到個車尾細成咁！（其實呢架車喺印度咁好賣，早已經有準備），但冇得揀嘅情況下都要出發㗎喇！喺深圳市區收工塞車時間，為逃離車龍先去華強路幫架車大掃除，兼買定多小小電子嘢旁身，將架車 set 到好似自己架車咁舒服後，喺晚上 10 點，終於喺深圳灣口岸接埋其他隊員出發！
第一晚嘅目的地：深圳松崗！（冇錯！我地打算聽朝大清早小車啲嘛！）
