由於今天要 4:30 am 起身嘅關係，旅程嘅第一個晚上幾乎冇瞓過，大早再一次檢查車輛後就 set 好導航準備出發。首個中途中係廣西嘅省會南寧，路程 640 km，一切唔塞車嘅話 5 個多小時就可以到達。
離開廣東省之路，絕大部份都已經行過好多次，選擇喺早上 6 點出車就係想避開 8 點開始珠三角地區嘅塞車時間。果然，無論廣深高速、虎門大橋、廣州繞城高速都路路暢通，一路上時不時都可以行到 130 ~ 140km/h，喺肇慶稍作休息 10 分鐘後，全程用咗 3.5 小時就已經離開熟悉嘅廣東省，進入廣西壯族自治區。
進入廣西，相比廣東省嘅瀝青三綫高速，廣西兩綫嘅石屎高速相對就冇咁舒服，行車嘈音亦較大，不過車流量唔算多，測速相機同區間測速亦明顯比廣東省小，keep 住快綫行總算舒服，至於梧州去玉林嘅一段公路，風景亦同熟悉嘅廣東無異，直至通過玉林之後才出現大量喀斯特地貌，呢個地帶北由桂林伸延至越南嘅下龍灣，不過我地路上經過嘅只屬小規模，取而代之好快就變成南寧嘅城市天際綫。
我地喺南寧停留嘅時間只有大約 3 小時，主要都係午飯同購買糧饗，而一場嚟到南寧，當然要試下本地最出名的檸檬鴨 ，呢種以壯族土鴨改良嘅食法，近年喺南寧相當受歡迎，除咗檸檬，亦會加入蒜米、酸辣椒、生薑等配料一齊炆，雖然略嫌肉質有啲硬，但入口酸酸辣辣好醒胃又唔算肥膩都值得一試。
.
其實，南寧人嘅飲食文化同廣東都大致一樣，甚至都係講廣東話，只不過由於省入面有唔少壯族人居住，先會興起呢類型嘅食物，好似呢間餐廳嘅佈局就大量用咗壯族嘅傳統裝飾，但真正嘅南寧人，始終都係鍾意去酒樓食點心，炒番碟河粉食嘅。
離開南寧之前，我地去埋附近嘅萬象城商場 Ole 超市買小小物資，因為過埋今日後沿路上就再冇貴價超市買進口房，卻無意之中俾我地發現超市正在做緊廣西百色嘅芒果 promotion，話說百色嘅芒果出晒名好多人都知，但卻估唔到佢地連台灣嘅凱特芒、泰國青皮芒等都全部成功引進，仲將佢地包裝成超矜貴嘅禮盒裝發售，經過現場試食，發現口感的確同原種唔差太多，結果就買咗一大箱上車，喺路上又有得開餐了！
[info]
甘家界牌檸幪鴨店
地址：南寧市青秀區仙葫大道西段16號
