欲速則不達，成為呢個行程一句成日 remind 自己嘅說話。
離開南寧，時間只係下午 3 點幾，未到 5 點已經去到同雲南交界嘅百色，此時距離昆明只有 530 幾公里，車外仍然係一片蕉樹同芒果樹，氣溫 33 度，完全自信凌晨前可以直衝昆明，此時一個奇怪嘅路牌突然出現，「直行（G80）廣昆高速」或「右轉（G78）汕昆高速往昆明」，明明知道應該直行，連 GPS 都係咁指示，卻信咗路牌經貴州去昆明，仲以為係新高速開通，可以快啲去到昆明食晚飯。
沿路呢條咁新咁順嘅路行駛，長期可以 keep 住 140 ~ 160 km/h 極速巡航，但一進入貴州境內，情況就急轉直下，路況就變成了 S 形的盤山路，不斷通過無窮無盡嘅隧道，大貨車仲以極慢速度的上斜路段無法趴頭，最討厭還是入埋雲層中，在全黑下雨嘅情況下，車速降至 60km/h 以下，寸步難行，實在沮喪之極。
如是者經過 3 小時嘅車程，終於行咗一半路程， GPS 顯示海拔已經升到 1,300 米，氣溫亦跌到只有 21 度，喺呢個叫做黔西南布依族自治州又出現另一個路牌：「左轉（G78）昆明」或「右轉（G60）貴陽」，雖然 GPS 提示右轉，但兩條路距離差成 200 公里，明明左轉係 shortcut，你又會點揀？如是者，又左轉！
選擇左轉後，唔駛 1 個鐘頭就進入雲南省內，而我亦決定轉手畀另一位同行者繼續奮鬥，但不諳「強國路況」嘅他，在通過省界收費站後，竟然無視地下大洞加速衝過去，大叫之際已經為時以晚，結果成個車尾拋起，後座兩位乘客就咁拋到撞傷頭，落車檢查後好彩冇咩大礙決定都係親自上陣，行埋剩番嘅 250 km 路程。
以為受過驚，應該有好運行吧！進入雲南境內，高速公路卻竟然變成國道，多彎大雨嘅路況，路上更有好多民間自設嘅減速壆，由於冇加上反光物料，結果一次又一次硬衝受罪，喺距離昆明市仲有 200 公里嘅某地方，終於決定放棄，喺 GPS 搵附近嘅一間 酒店入住。或者係成晚唯一一個好消息，呢間位於曲靖師宗嘅子午君酌溫泉渡假村，算得上係 4 星級數，起碼夠大夠乾淨，而且只係 250 RMB 一間房，冇 out-budget 之餘算係瞓得安樂。
經此一役，都係跟番自己 plan 嘅路綫穩陣啲！貪快，得個桔！
