傣菜？你係咪寫錯字呀？唔單止你可能會質疑我，就連同行嘅隊友都一樣有呢個疑問，行程到咗第 3 日，理應由曲靖直奔大理追回琴日行錯路嘅時間，但為咗食一餐正宗「傣」菜，點都要一入昆明市區，甚至 by pass 石林等景點也在所不昔。
所謂嘅傣菜，其實就是泰國民族嘅其中一個分支，佢地長久居於雲南南部西雙版納州，當地與老撾接壤，跟泰北嘅清萊亦只係兩、三小時車程，生活文化、飲食習慣甚至係地貌都同泰國非常相似，一直都係個人其中一個自駕遊目的地（當地已開放中國車出境往東南亞各國）。而喺昆明，市內亦有唔少傣菜館，大部份都係以竹棚風味見稱，但天公不造美，大雨下只好選擇一間坐得比較舒服嘅餐廳。
雖然傣族同泰族嘅文化極相似，但翻開菜牌卻會發現好多菜式都前所未見，例如菠籮紫米飯，同泰國講求鑊氣嘅菠蘿炒飯就好唔同，又好似包燒金針菇呢類菜式，就係傳承了傳統芭蕉業炭火燒拷嘅做法，畀曼谷菜系影響嘅泰北地區已經越黎越難搵到。
同泰北人一樣，傣菜亦有唔少豬油炸系列，豬皮、香蕉等同泰國差異不大，亦有泰北人鍾愛嘅炸昆蟲系列。
除咗上述嘅菜式外，另一種比較特別嘅菜稱為「撒」，亦即係涼菜，呢種口味與緬甸山族有點相似（詳見稍後有關緬甸曼德勒嘅介紹），好似我地嘗試嘅檸檬撒，就係將牛肉沾上酸酸辣辣嘅醬汁中，用作增加食慾。而另一種叫做鬼雞嘅前菜，就係當地版嘅手撕雞，再加上其他辣椒等凍食。
至於飲品，例如傣家水酒同泡魯達，都係屬於超甜系列，但傣族人亦會自釀米酒，感覺就好似跟中國差異不大了！
[info]
傣家竹樓
地址：昆明市五華區三合營路 66 號
電話：+86 (0) 871 6361 8908
營業時間：11am – 10pm
泊車：門外有停車位
